Вазирлик фаолияти бЎйича телефон рақами (+99871)2394077

Республика ўқув-тарбия муассасалари фаолиятини ташкил этиш бўйича низом лойиҳаси муҳокамага қўйилди

2019.06.19 | Янгиликлар

Халқ таълими вазирлиги Республика ўқув-тарбия муассасалари фаолиятини ташкил этиш бўйича Низом лойиҳасини ишлаб чиқди ва умумхалқ муҳокамасига қўйди.

Эслатиб ўтамиз, “Ўзбекистон Республикаси Президентининг “Ихтисослаштирилган ўқув-тарбия муассасалари фаолиятини тубдан такомиллаштириш тўғрисида” 2019 йил 29 майдаги ПҚ-4342-сон қарори билан Республика ихтисослаштирилган ўқув-тарбия муассасалари ташкил этиляпти.

Қарорга кўра, Ўзбекистон Республикаси Халқ таълими вазирлиги ҳузурида Республика ўғил болалар ўқув-тарбия муассасаси ҳамда Республика қиз болалар ўқув-тарбия муассасаси (кейинги ўринларда — Республика ўқув-тарбия муассасалари) ташкил этилмоқда.

“Республика ўқув-тарбия муассасалари фаолиятини ташкил этиш чора-тадбирлари тўғрисида”ги Ўзбекистон Республикаси Вазирлар Маҳкамасининг қарори лойиҳаси мазкур қарорнинг ижросини таъминлаш мақсадида ишлаб чиқилди.

Низомда ўқув-тарбия муассасасининг асосий вазифалари қуйидагилар ҳисобланиши белгиланмоқда:

баркамол, жисмоний ва руҳий соғлом шахсни Ватанга садоқат руҳида тарбиялаш, болаларда меҳнатсеварлик, ватанпарварлик, масъулиятлилик, фидоийлик, дунёқараши кенг мустақил ва комил инсон бўлишга интилиш туйғусини шакллантириш;

болаларнинг ёшига хос бўлган психофизиологик мойилликлари, қобилиятлари, қизиқишларига, болалар ҳаёти ва соғлиғини сақлаш талабларига мувофиқ тарзда уларнинг ақлий, эмоционал ва жисмоний ривожланишига кўмаклашувчи психологик, тиббий ва ижтимоий реабилитациясини таъминловчи чора-тадбирларни амалга ошириш;

болаларнинг давлат таълим стандартлари асосида мажбурий умумий ўрта таълим олиши учун шарт-шароитлар яратиш;

тарбияланувчилар дуч келадиган муаммоларни муҳокама қилиш, уларнинг ечимини топиш ва тарбияланувчиларнинг ҳуқуқий билимларини оширишга қаратилган “case-study”, гуруҳларда ишлаш, баҳс-мунозаралар, ситуацион ўйинлар, ақлий ҳужум каби илғор интерактив ўқитиш усулларини ўқув-тарбия жараёнига кенг жорий этиш;

тарбияланувчиларда меҳнат кўникмалари ва мустақил ижодий фикрлаш қобилиятини шакллантириш, уларни касбга йўналтириш ва бўш вақтларини самарали ташкил этиш.

Шунингдек, низомга асосан ўқув-тарбия муассасаси фаолиятини ташкил этиш ҳамда ўқувчиларни қабул қилиш ва чиқариш тартиби, ўқув–тарбия жараёни қатнашчилари, ихтисослаштирилган муассасаларни бошқариш тартибларини тасдиқлаш режалаштирилган.

Ўзбекистон Республикаси Халқ таълими вазирлиги

Cайтнинг очиқлик сиёсати

Материалдан тўлиқ ёки қисман фойдаланилганда, uzedu.uz манбаси кўрсатилиши шарт.

Вазирлик сайтининг олдинги варианти.

Ҳозир сайтда: 26

Хато кўрсангиз белгиланг ва Ctrl+Enter ни босинг.